Dim ond ychydig wythnosau sydd ar ôl tan yr ŵyl, gydag arddangosfeydd, dosbarthiadau meistr a’r Siop Sgiliau hynod boblogaidd yn aros. Rydym hefyd yn ehangu ac yn cyflwyno elfennau ychwanegol a newydd i’n digwyddiad.
Newydd – Siop Sgiliau i Blant
Mae gennym wyth sesiwn dros ddydd Sadwrn 18 a dydd Sul 19 Awst gyda chyfleoedd gwych i blant dros 7 oed roi cynnig ar bedwar sgil gwahanol.
Bydd pob sesiwn yn para 2 awr o 10am tan 12pm neu o 2pm tan 4pm gyda chyfanswm o 3 myfyriwr ym mhob sesiwn.
Mae’n bosib cadw lle ar eu cyfer ddydd Sadwrn 18 Awst yn ein pabell fawr ar Ffordd y Dywysoges.
Bydd ein criw yno’n gynnar i gymryd enwau gan y bu’r digwyddiad hwn yn un hynod boblogaidd yn 2016!
________________________________________________
Newydd – Graffiti Gwau
Mae’r gweithgaredd hwn wedi bod yn llwyddiannus iawn, gyda Shirley a Debi’n arwain y ffordd.
Cynhelir y cyfarfod nesaf ar 29 Mehefin am 2pm yng nghaffi’r Ganolfan Ddinesig lle gall unrhyw un alw heibio i drafod a chreu ar gyfer y digwyddiad pwytho arbennig hwn.
Os ydych yn mwynhau gwau a/neu grosio byddech yn mwynhau’r hwyl o greu creaduriaid y môr i’w haddurno o amgylch y pier – dyma’r digwyddiad i chi!
________________________________________________
Newydd – Arddangosfa Cwiltio
Ar 18 ac 19 Awst, bydd gennym Arddangosfa Cwiltio newydd, arbennig yn yr LC.
Bydd ymwelwyr yn gallu gweld dros 100 o gwiltiau a grëwyd gan grwpiau ac unigolion ar draws de Cymru yn ogystal â chwiltiau clasurol a hen a chyfle i weld a rhoi cynnig ar greu lês.
_________________________________________________
Newydd – Marchnad i Wneuthurwyr a Masnachwyr
Byddwn hefyd yn cynnal ein Marchnad i Wneuthurwyr a Masnachwyr yn Amgueddfa Genedlaethol y Glannau, drwy arddangos cynnyrch tecstilau hyfryd o Gymru ac yn dod â masnachwyr sy’n arbenigo mewn cwiltio, gwau a phwytho at ei gilydd ar gyfer y rhai sy’n dwlu ar bwytho.
__________________________________________________
Prosiect Ysgolion Newydd | Addurno cadair gynfas
Roedd y bolardiau wedi’u haddurno yn hyfryd yn 2016 felly rydym wedi bod yn cadw rhai ysgolion yn brysur drwy wneud hyn yn ogystal â’n her newydd o addurno cadair gynfas gan ddefnyddio thema’r môr.
Rydym wedi dosbarthu 35 o’r rhain yn dilyn cais cyllido torfol llwyddiannus ar Just Giving lle cawsom yr arian i’w prynu.
Gwaith gwych gan ein Cydlynydd Ysgolion, Alyson, wedi’i gefnogi gan Robi a Shirley!
Diolch i bawb.
Am fwy o wybodaeth am Ŵyl Bwytho Abertawe 2018, gallwch ymweld â’r wefan neu ewch i dudalen Facebook yr ŵyl am y newyddion diweddaraf.